اسفه اتأخرت عليكم لان في الايام اللي فاتت حصلت ظروف جديدة مش عارفه أوصفها لكم ازاي .. حبيبي وصل و الحمد لله و معايا الوقتي و كمان خلاص فرحنا كمان يومين بس .. بس رغم اني عاوزة الفرح يجي بسرعه علشان افرح مع اهلي بليلة العمر رغم اني خايفه من حاجه .. ان بعد الفرح علطول حسافر اخر الدنيا و حسيب اهلي .. بس انا مش خايفه اوي لان الانترنت الوقتي بيقرب البعيد و حكون معاهم علي طول و اوعدهم اني عمري محبعد عنهم و حكون دايما معاهم بقلبي وروحي .. و حفضل فاكرة نصايح امي الغاليه و ضحك ابويا و تجمع العائلة و حبنا لبعض .. أدعولي بقي علشان خلاص حبدأ قريبا الحياة الجديدة و انتظروني علشان ححكلكم علي الفرح و كمان حقولكم مفاجئة .. اللي اللقاء
انا و بنات عمي 14 سبتمبر
طول عمري مرتبطة بأهلي اوي و اقاربي بشكل عام .. بس بنات عمي بجد ليهم حب خاص في قلبي فأنا متربيه معاهم و دايما مع بعض من صغرنا و كمان بنخاف علي بعض و بنحب بعض .. و في يوم من اربع سنين كده كنت بتكلم مع بنت عمي و احنا واقفين بنغسل المواعيين في المطبخ و قالتلي تفتكري اننا ممكن نفترق ؟؟ فقولتلها ليه بتقولي كده لا طبعا .. فقالتلي يعني ممكن كل واحده تتجوز و تروح في حته شكل ؟؟ فقولتلها مفكرتش في الموضوع ده قبل كده .. بس عمرنا محنفترق ان شاء الله .. ايه اللي خيفرقنا بس ؟؟ و مرت الايام و السنين .. و لقيت بنت عمي الكبيرة ( زعيمة العصابة ) سافرت لأحدي الدول العربية للعمل بها و كمان حتتجوز من هناك .. و بعديها لقيت اختها بتقولي انا جالي عريس .. ففرحت اوي و من شده الفرحه بكيت .. وقالتلي أنه شاب من أحدي الدول العربية برضه .. فقولتلها بجد؟؟ فقالتلي ايوة .. و فعلا حضرنا فرحها هنا في مصر و لكن بنت عمي الكبيرة اتجوزت في بلد جوزها .. و للأسف مقدرتش اروح فرحها .. مع بعض المهم الكلام ده من سنه تقريبا .. و فعلا عمرنا مفترقنا و الحمد لله رغم بعد المسافه و لكن فضلنا مع بعض علي النت علطول و فاكريين بعض دايما .. و بعدين زي منتم عارفين اني مخطوبة و كمان فرحي فاضل عليه ايام .. فلقيت بنت عمي الكبيرة زعيمة العصابة بتقولي انها جاية الفرح .. مش قادرة اوصف لكم فرحتي .. بنت عمي جاية فرحي و كمان حشوف يويو ابنها .. مكنتش مصدقه نفسي .. و كنت مستنية كمان اعرف اختها جاية ولا لأ ؟؟ فقالتلي لا مش حتقدر تيجي .. فحزنت جدا لاني كنت عاوزة اشوفها و اشوف لولو بنتها القمر .. و فاجئة كنت قاعده من مرات عمي اللي انا بعتبرها انها امي لانها ربتنا و عملتنا كتير .. فقالتلي ان ام لولو جاية .. و الله لولا اني كنت في الشارع لكنت رقصت من الفرحه .. و فعلا جت أم يويو و شوفتها و شوفت يويو القمر و مش قادرة اوصف احساسي لما مسكت يويو نسيت كل حاجه .. كل القلق و التعب .. و حسيت براحه لا توصف .. انا ماسكة ابن اختي و صديقه عمري .. مش معقول .. و كمان جت المفاجئة التانية أم لولو .. بس لسة مشوفتهاش حشوفها بكرة هيا و لولو و حبقي اقولكم كان اللقاء ازاي
ادعولي 14 سبتمبر
زي منتم عارفين اني سأتزوج قريبا جدا ان شاء الله من شاب يعيش في اخر البلاد و المفروض اني حسافر معاه بعد الزفاف بس عندي مشكلة و مش عارفه اعمل ايه ؟؟
الوقتي انا طبعا علشان اسافر عاوزة فيزا و بالتالي روحت علشان اعمل الفيزا علشان اسافر معاه و الكلام ده من اول لما اتخطبت و انا بقدم علي الفيزا سألتهم و كلي أمل .. حاخد الفيزا امتي ان شاء الله قالولي من أربعة الي ستة اشهر و قابلة للمد .. فطبعا صدمت لاني بهائية الديانة و في التشريع البهائي ان الخطوبة لابد و ان تكون 95 يوم فقط و بالتالي مش حقدر أسافر و خايفه اوي ان الفيزا بتاعتي تترفض لان الدول الاجنبية مش بتعطي الفيزا لاي حد بالساهل .. بس أنا أملي في ربنا كبير و واثقه في الله انه حيعمل لي الخير و انا دايما بدعي لله انه يعمل الخير للجميع و كمان يعطي كل انسان اللي نفسة فيه .. أرجوكم ادعولي ربنا يكمل فرحتي و أقدر أسافر مع شريك حياتي .. و أقدر بعد كده احكلكم عن الحياة الجديدة
أحدث التعليقات