حياة جديدة

هذا يوم فيه أنار افق الفضل وظهر القيوم وبيبده رحيقه المختوم

هو ….. 14 سبتمبر

dsc_0014.jpg    dsc_0017.jpg

مش عارفه اوصف لكم الغربه صعبه اد ايه خصوصا لو كان ليكم اهل زي اهلي بيحبوني و بحبهم و علي طول في بالي .. و لكن بجد اللي مهون عليا كل ده حبيبي .. احسن راجل في الدنيا .. كنت دايما خايفه من الزواج و اني اتزوج واحد غلس يقرفني في عشتي و في النهايه الطلاق هو الحل الامثل..  ولكن انا أهلي ربوني علي اني مفيش حاجه اسمها طلاق لانه مش محبب في اي دين و علشان كده سبولي حريه اختيار شريك حياتي .. كنت في الاول خايفه و مكنتش عاوزة اتجوز علشان انا مبحبش الفشل و عاوزة انجح في حياتي و كنت دايما بسمع ان الرجاله بتترسم علي البنات لحد ميوقعوهم في حبهم و بعد كده يبانوا علي اصلهم .. و لكن بجد محصلش كده معايا انا زوجي ممثلش عليا خالص و كان واضح وصريح معايا من الاول في كل شئ .. كمان وعدني في الاول انه حيخليني اسعد انسانه في الدنيا وبجد بجد مصدقتوش في الاول و قولت كلهم بيقولوا كده في الاول من فرحتهم و كل ده وهم ..  بس الحقيقه ان لحد الان مفيش حد في الدنيا دي كلها اسعد مني فعلا .. الحمد لله .. (ربنا قال في كل الاديان ان اهم حاجه في الزواج الحب و الرحمه و الموده) .. متبخلوش علي بعض بحبكم و متستنوش مين اللي يبدأ .. بلاش الكبرياء يدخل بنكم و فعلا انا بعمل كده مع حبيبي .. مبنتظرش هو حيعملي ايه ؟؟ و لا حيجبلي ايه ؟؟ و لا بكام ؟؟ دايما بسأل نفسي انا بعمله ايه ؟؟ و حسعده ازاي ؟؟ و اعتقد هو ده الحب الحقيقي .. وكمان انا و هو علطول بنفكر في الله و خنخدم الله ازاي ؟؟ و حنعمل ايه علشان ربنا يرضا علينا و يوفقنا في حياتنا ؟؟ و بجد انا مكنتش اعرف ان ربنا بيحبني كده وراضي عليا ان يديني زوج رائع و انسان بهائـــــي بجد .. بيحب الله ودايما بيحاول يرضيه .. و بيحب الناس و الناس بتحبه .. و طبعا بيحبنـــــــــــــــــــي و اكيد انا بحبــــــــــــــــــــــــه .. ادعولي اني اقدر اسعده

 

14 Responses to “هو …..”

  1. سمر Says:

    حبيبة قلبى انت قمارايه وتستهلى كل خير والكل بيحبك وبيدعيلك ربنا يهنيكى ويسعدك فى حياتك ونشوفك فى وسط اولادك يوسف ومريم يارب عن قريب بأذن الله وانا فعلا بحيكى على فكرك الجميل وموقعك الشيق فعلا باقضى عليه معظم وقتى جميل جميل جدا فعلا يا صافى ربنا معاكى عارفه يا صافى على قد منا مشتقالك ومشتاقه لايامنا الجميله والبحر والصيف الجميل وووووووذكريات جميله كتتييير على قد مابفرح لما اسمع انك سعيدة وان ربنا اهداكى انسان صالح لانك انسانه جميييله ياحبى

  2. انا مبسوطة جدا علشانك
    المهم انت لسه فى بداية حياتك ولم تمري باي مشاكل بعد، لذلك ارجو منك انت تكون نظرتك للحياة ولشريك حياتك دائما كما كتبتيها الان وكلما مرت بك مشكلة عودى لاى مدونتك الجميلة واقرأي ما كتبته واستعيدى تلك المشاعر الجميلة
    بالتوفيق

  3. nagham Says:

    الله يسعدك يهنيكي دايما ياصوفي ياعسل وحشتيني اوي اوي وتفضلي دايما مبسوطه مع اللي قلبك اختاره
    http://heart99.wordpress.com/
    نغم

  4. نير Says:

    وحشتينا أو ي ياصافي بجد د
    فعلا إنتي عارفه إن الواحد في كل مرحلة من حياته ليه دور لازم يأديه وأكيد إنتي عارفه دورك إيه في الفترة دي وإن يمكن ربنا مديكي فرصة تعملي إلي كان نفسك تعمليه في مصر من زمان ربنا يوفقك يارب وتكوني دايما سعيدة يارب وربنا يخليكي لفرزام ويخليه ليكي يا قمر.
    وبجد يا صافي أنا فعلا فرحان ليكي ويارب يارب دايما تفضلوا سعداء كده على طول
    وبعدين الرؤية مش هتبان بقى ولا إيه
    ياريت تخلي بالك على جوزك وعلى نفسك يا قمر
    سلميلي عليه

  5. sophy19 Says:

    انت كمان وحشتني يا نينو و يارب انت كمان تكون سعيد و مبسوط في حياتك دايما و متنساش تعزمني علي فرحك

  6. sophy19 Says:

    يا نوغه يا حبي و الله وحشتيني اوي يا بنت الخال نفسي اشوفك اوي و نتكلم مع بعض زي زمان قوليلي عمله ايه في الكليه يارب تكوني مبسوطه في الدنيا الكبيره الغريبه اللي اسمها الكليه

  7. sophy19 Says:

    ايوة يا مروة و الله انا عارفه اني لسه في بدايه المشوار و لسه الحب مشعشع الوقتي بس انا عاوزة الحب ده يفضل علي طول و ان شاء الله حيفضل.. عارفه ليه لانه حب صادق و ان شاء الله حيفضل علي طول لاني مش بخيله بحبي عليه و هو كمان مش بخيل عليا بحبه .. بس بجد انتي وحشتيني اوي يا مروه و نفسي اشوفك اوي و اشوف اولادك و يا ريت تبعتيلي صورهم .. اكيد قمرين زيك يا قلبي .. ادعيلي يا حبي

  8. ola Says:

    حبيبتي صافي وحشتيني جدا جدا والله انا مقصرة معاكي ومش باراسلك بس فعلا مشاغل الحياة والدراسة بئة بس انتي في بالي وعلى فكرة المدونة بتاعتك زي العسل ومواضيعها لذيذة جدا وكمان انا قرأت كلامك عن زواجك بجد انا سعيدة اوي اوي انك سعيدة في زواجك ويا رب دايما كدة مبسوطين وبتخدموا الامر وربنا راضي عنكم انتي تستهلي كل خير يا حبيبتي عشان كدة ربنا اعطاكي هدية الزوج والزواج الصالح واكيد هو كمان انسان جميل اوي عشان ياخد الوردة القمر ديه يلا المهم اني دايما باطمئن عليكي من ايميلاتك والمدونة بتاعتك

    سلام يا قمر

    علا

  9. sophy19 Says:

    سمر يا قمر يا قمر انتي كمان وحشتيني اوي ووحشتني ايام زمان و نفسي ارجع و اشوفكم تاني لانكم غاليين عندي اوي .. خدي بالك من نفسك يا قمر و من بناتك و من حبيبه قلبي تانت فريهان .. و ادعيلي يا سمر لاني و الله محتاجه دعاكم و حبكم ليا ..

  10. Amel Salem Says:

    الحبيبه الرقيقه صافي
    انا سعيده جدا باخبارك الجميله دي وكمان شكرا قوي على النصائح المفيده , وعايزه اقولك على حاجه , انتي ربنا بيحبك ووفقك لانسان كويس لآنك انسانه جميله بكل معاني الكلمه من جمال فأنتي جميلة الروح والأخلاق والذوق وفوق هذا كله جميلة الشكل والعقل وأي اب وأم لهم ابنه مثلك انتي واختك لابد ان يكونوا فخوريين بكم ولانهم راضيين عنكم ربنا بيوفقكم في حياتكم وبيبارك لكم في كل خطوه , وانا ايضا فخوره بكم وادعوا لكم بالحفظ ورعاية المولي والتوفيق في خدمة امره المبارك
    قبلاتي واتمنى اني دائما الخير منكم
    أمل- الأسكندريه

  11. nagamat Says:

    الحبيبه الغاليه / صافى
    لقد سعدنا جميعاً بزواجك ولم نكن نحلم برجل يكون زوجاً لك أفضل من زوجك الكريم وهذا ما أكمل سعادتنا ولقد زكرتى لنا جوانب من سعادتكم ومعظمها مذكورة عندنا فى لوح وصايا حضرة عبد البهاء للزوجين فإجعلى هذا اللوح المبارك منهج حياتك ودائماً ترجعين إليه أولاً بأول باركك الله وسدد خطاك وأدام عليك السعادة والهناء ،،،

  12. Sally Hooby Says:

    ايه الجمال ده🙂 ربنا يخليكو لبعض علطول يارب وتتحقق كل أمانيكم. كلامك جميل أوي وانت جميلة وإن شاء الله تكون حياتك كلها جميلة ببركة الحمال المبارك عليكي وعلى عيلتك النونو والكبيرة. أنا بصراحة مش فايقة أستعمل النت أوي،بس قلت لازم أباركلك عالأقل.
    وفعلاً إذا مكنش الزواج اتوجد بالحب يبقى بلاش منه أبداً، ونهايته السريعة أحسن من من محاولة استمراريته الفاشلة. وأنا كان نفسي أحضر فرحك وأعمل فرحي في مصر، بس ماكانش ليا نصيب! بس أحلى حاجة إني اتجوزت العمري ماتخيلت إني هلاقيه في حياتي بجد. بس مقدرش أقول زي الكلام الرهيب الإنتي بتقوليه ده في حقه🙂 أنا بس أتمنى أقدر أشكره على حبه ليا وأظهرله حبي ليه.واحنا فعلاً بنبادل بعض نفس الشعور والتصرفات والأفكار، حتى بنقول نفس الكلام سوى وبنعمل نفس الحاجة ونتفاجئ ببعض🙂 يارب يكون الكل سعيد زينا وأكثر. عظمة ربنا كبيرة عالكل. واستمري وطوري في الموقع أكثر بس متنسيش حياتك المهنية، مهنتك جزء أساسي من شخصيتك وده المدوخني طول عمري هاهاهاهاهاها. ربنا يوفق العالم كله بفضله ورحمته وحبه السبب الوجود. الله أبهى.

  13. sophy19 Says:

    وحشتيني يا سوسو اوي اوي اوي و فعلا كان نفسي تحضري فرحي بس يخسارة انتي كنتي بعيد اوي .. بس اكيد كنتي معايا بقلبك الجميل الصافي ..
    و مبروك علي جوازك و يارب دايما تكوني سعيده انتي و زوجك الغالي و تبنوا بيتكم بالحب و يكون دايما مفتوح لحضرة بهاء الله

  14. hassan Says:

    بصي انا والله مبسوط …بجد يعني مبسوط اوي ليكي…يعني انا لما بلاقي حد مبسوط بتبسط معاه يمكن لاني مش مبسوط … بجد والله من اعماق اعاميق قلبي انا بتمنالك السعادة الابدية مع زوجك وان شاء الله مع اولادك ….بس انا في حجات كدا شوفتها يمكن في اسرتي ويمكن في اسر تانية نفسي متحصلش في اسرتك انتي كمان …لان علي ما اعتقد ان الحجات دي هي اللي بتخلي الدنيا مش حلوة”مش حلوة خالص” …اول حاجة المشاركة بينك وبين زوجك مشاركة بجد بقي مش “مشاركة بوقيقي” زي عايزة حاجة يا حبيبتي وقبل متردي يروح يقولك طب تصبح علي خير وقبل ميكملها يبقي بيشخر وفي سابع نومة ….لا كل واحد عليه يوم في الطبيخ وكل واحد عليه يوم في الغسيل …وفي كل حاجة بقي النص بالنص يعني …يعني بلاش شغل الناس اللي يبقي الراجل والست متبهدلين في الشغل سوا وحضرته يرجع ينا ويستني الغدا والمسكينة ترجع تطبخ وتنضف وتقعد تذاكر مع العيال كمان …كمان بصي ان شاء الله لما يبقي في اولاد لازم انك تكتشفيهم وتخليهم هما كمان يكتشفوا نفسهم بيحبوا ايه بيبدعوا في ايه اصل كل واحد فينا بيتولد وجواه حاجة هو عبقري فيها ….ومهمة الاب والام هنا انهم يكتشفوا الحاجة دي في فترة الطفولة وبعدين يخلوا الولد يكتشفها لما يكبر شوية …وبكدا الولد يبقي عنده ثقة بالنفس ويبقي موهوب من وهو صغير ….طيب لو بقي في مشاكل واتمني من جوا قلبي انه ميبقاش في مشاكل متنقشوش المشاكل قدام الاولاد حتي ولو كانت المشكلة صغيرة جدا جدا بس مناقشتها قدام الولاد الصغيرين هتاثر فيهم قوي لان نفوسهم هما كمان صغيرة قوي قوي وبتتاثر بسهولة ….


أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s